බ්‍රිතාන්‍යය අග්‍රාමාත්‍ය ධූරය සඳහා කන්සර්වේටිව් පක්ෂයේ මන්ත‍්‍රීන්වරුන් අතර තියුණු තරගයක් හටගෙන ඇත.
විදෙස් මාධ්‍ය වාර්තා කළේ මේ වන විට එහි පෙරමුණ ගැනීමට එරට හිටපු විදේශ ලේකම් බොරිස් ජොන්සන් සමත් වී ඇති බවයි.
බ්‍රිතාන්‍යය යුරෝපා සංගමයෙන් ඉවත් විය යුතුය යන ප්‍රචාරක ව්‍යාපාරයේ වඩාත්ම ඉදිරියෙන් සිටියේ ඔහුයි.
බ්‍රිතාන්‍යය අග්‍රාමාත්‍යවරිය වන තෙරේසා මේ, සිය ධූරයෙන් ඉල්ලා අස්වන බවට නිවේදනය කිරීමත් සමග ඇගේ පක්ෂය වන කන්සර්වේටිව් පක්ෂය තුළ නායකත්වය සඳහා තරගයක් පැවතියේය.
බොරිස් ජොන්සන්, ජෙරමි හන්ට් , මයිකල් ගොව්, ඩොමිනික් රාබ්, සජිඩ් ජාවිඞ්, රෝරි ස්ටුවට්, මැට් හැන්කොක්, ඇන්ඩි‍්‍රයා ලීඩ්සම්, මාක් හාර්පර් , එස්තර් මැක්වේ අතර මෙම අගමැති සටන පවතියි.
කෙසේ වෙතත් ජ්‍යෙෂ්ඨ කොන්සර්වේටිව් පක්ෂ ක්‍රියාකාරිකයෙකු සහ ලන්ඩන්හි හිටපු නගරාධිපතිවරයෙකු ද වන බොරිස් ජොන්සන් එම සටනේ පෙරමුණ ගෙන තිබීම විශේෂත්වයකි.
ඒ වෙනුවෙන් පක්ෂය තුළ පැවති රහස් ඡන්ද විමසීමකින් ඔහු ඡන්ද 114ක් ලබාගෙන ඇත.
ජෙරමි හන්ට් එහි දෙවැනි ස්ථානයේ පසුවන අතර ඔහු ලබාගෙන ඇති ඡන්ද ප්‍රමාණය 43කි.
කෙසේ වෙතත් පක්ෂය තුළ පැවති පළමු ඡන්ද විමසීමෙන්ම බොරිස් ජොන්සන් ප්‍රතිවාදී අපේක්ෂකයින් අභිබවා සැළකිය යුතු මට්ටමේ ඡන්ද ප්‍රමාණයක් ලබාගෙන ඉදිරියට පැමිණ තිබීම කැපී පෙනුණි.
බ්‍රිතාන්‍යයේ මීළඟ මහ මැතිවරණය පැවැත්විය යුත්තේ 2022 වසරේ මැයි මස 5 වනදාට පෙරයි.
බ්‍රිතාන්‍යය අග්‍රාමාත්‍යවරිය වන තෙරේසා මේ ගේ ඉල්ලා අස්වීමේ තීරණයත් සමඟ ඉදිරි වසර 3ක කාලය සඳහා අග්‍රාමාත්‍ය ධුරයේ පවතින්නේ පුරප්පාඩුවක්.
ඒ සඳහා එරට කන්සර්වේටිව් පක්ෂයේ ප්‍රබලයින් 10 දෙනෙකුගේ නම් යෝජනා වී ඇත.
Be First to Comment